Goodbye 2013... Hello 2014

                                             Galle မြို့၊ သီရိလကာင်္နိုင်ငံ

၂၀၁၃သည်ကိုယ့်အတွက်တော့ခရီးသွားနှစ်ဖြစ်သည်။ သွားလိုက်ရတဲ့ခရီးတွေဆိုတာလေ… ခရီးဆောင်အိတ်ဆိုတာနားရတယ်ကိုမရှိ။ ခလေးတွေကျောင်းပိတ်ရက်ရှိသည်နှင့်ခရီးထွက်ရတော့တာ။ ခရီးတစ်ခုကပြန်လာပြီးသည်နှင့်နောက်ခရီးစဉ်အတွက် လေယာဉ်လက်မှတ်စီစဉ်၊ ဗီဇာတွေလျှောက်ရတာ လုပ်ရိုးလုပ်စဉ်တစ်ခုလိုတောင်ဖြစ်နေခဲ့ပြီ။

၂၀၁၃နှစ်ဦးမှာမလေးရှားခရီးစဉ်ပြီးတော့ဖေဖော်ဝါရီလအတွက်ရန်ကုန်ပြန်ဖို့ပြင်ဆင်ခဲ့ရသည်။ရန်ကုန်ကပြန်လာပြီးတာနှင့်Aprilနောက်တစ်ခေါက်ပြန်ဖို့စီစဉ်ရပြန်သည်။ Aprilရန်ကုန်ခရီးစဉ်ပြီးတော့တကယ်ကပြင်သစ်သွားဖို့ဖြစ်ပေမဲ့ ရန်ကုန်ကအလုပ်တွေမပြတ်တာမို့ဇွန်လကုန်တာနှင့်ရန်ကုန်တစ်ခေါက်ပြန်ရပြန်သည်။ ရန်ကုန်ကပြန်လာပြီးတော့ ဇူလိုင်မှပြင်သစ်နှင့် အီတလီသွားလည်ဖြစ်သည်။ ကျောင်းတွေပြန်ဖွင့်ပြီးနောက်အောက်တိုဘာကျောင်းပိတ်ရက်တိုမှာလည်း ရန်ကုန်ပြန်ပြေးရပြန်သည်။

ရန်ကုန်ကပြန်လာပြန်တော့ဒီဇင်ဘာမှာသီရိလကာင်္သွားဘို့ပြင်ဆင်ရပြန်သည်။သီရိလကာင်္မှာဘဲနှစ်ကူးခဲ့ပေမဲ့ ခရီးသွားနှစ်ကဒီနှစ်ထဲထိဆက်ပါလာပြန်သည်။နောက်နှစ်ပတ်နေရန်ကုန်ခဏပြန်ရပါဦးမည်။

၂၀၁၃ကိုခြုံကြည့်ရပါလျှင် ကိုယ့်အတွက်အလွန်ကောင်းသောနှစ်တစ်နှစ်ဖြစ်ခဲ့ပါသည်။ လုပ်ကိုင်သမျှအောင်မြင်ခဲ့သော ကြံစည်သမျှအထမြောက်ခဲ့သော စိတ်ကူးများလက်တွေ့ဖြစ်လာခဲ့သောနှစ်တစ်နှစ်မို့ နှစ်ကုန်ခါနီးမှာ ကုန်လွန်သွားမှာစိုးရိမ်မိသောလွမ်းဆွတ်မှုကိုခံစားရပါသည်။

ဒါပေမဲ့ထိုင်လွမ်းနေဖို့အချိန်ကိုယ့်မှာမရှိပါ… ကိုယ်တောင့်တခဲ့သောပြောင်းလဲမှုများက လက်တွေ့မှာတကယ်ဖြစ်လာခဲ့ပြီမို့ ထိုပြောင်းလဲမှုတွေနှင့်အသားကျဘို့ ကိုယ့်ကိုကိုယ်လေ့ကျင့်ယူရပါဦးမည်။

ဒါကကိုယ့်အတွက်ကိုယ်ရွေးချယ်သောစိန်ခေါ်မှုဖြစ်သည်။

၂၀၁၄ထဲမှာအရေးကြီးသောဆုံးဖြတ်ချက်တစ်ခုကိုချဘို့ရှိသည်။ထိုဆုံးဖြတ်ချက်ကလည်းတကယ့်ကိုကြီးမားသောစိန်ခေါ်မှုဖြစ်နေပြန်သည်။မိသားစု၏လိုအင်မှန်သမျှကိုဖြည့်စွမ်းပေးလေ့ရှိပြီး မိသားစုကို လိုတရ စေခဲ့သော ခင်ပွန်းသည်၏တောင်းဆိုမှုတစ်ခုကို လိုက်လျှောမည်၊မလိုက်လျှောမည်ကို တိကျစွာဆုံးဖြတ်ရမည့်နှစ်ဖြစ်သည်။

၂၀၁၃မှာပျော်ခဲ့သလိုမျိုး၂၀၁၄မှာအချိန်တိုင်းပျော်ရပါ့မလားမသေချာပေမဲ့ စိန်ခေါ်မှုများစွာနှင့်စောင့်ကြိုနေသော၂၀၁၄ရဲ့ဂိတ်တံခါးကိုတော့စမ်းတဝါးဝါးနှင့်ဖွင့်ဝင်လာခဲ့ပြီ….
ခြေလှမ်းတိုင်းသေချာနေစေဖို့ ကြိုးစားအားတင်းလျှက် ရဲဝံ့မှုဝတ်ရုံကိုခြုံလွှမ်းကာ မာန်တင်းလျှောက်လှမ်းဝင်ရောက်ခဲ့ပါပြီ... လူ့သဘာဝအရ အကောင်းဆုံးကိုသာလိုချင်တတ်တာမို့ အကောင်းဆုံးတွေကိုသာတောင့်တရင်းနှစ်သစ်ထဲကိုဝင်လာမိခဲ့ပြီ....၂၀၁၄ဟာ ကိုယ့်ကိုကောင်းခြင်းများနဲ့သာကြိုဆိုနေပါနော်....

၂၀၁၄ကိုအတူတူဝင်ရောက်လာကြတဲ့မိတ်ဆွေများအားလုံး၂၀၁၄မှာကောင်းခြင်းများကိုသာရရှိကြပါစေလို့ဆုတောင်းရင်းနှစ်သစ်ကိုကြိုဆိုလိုက်ပါတယ်….

စာဖတ်သူမောင်နှမများရွှင်လန်းချမ်းမြေ့ကြပါစေ။

ချစ်ခင်စွာဖြင့်

Rose of Sharon